Mäsüt Özil Germaniya cıyılma komandasınnan kitä

Törek millätennän bulğan alman futbolçısı Mäsüt Özil Germaniya cıyılma komandasınnan kitä. Bu xaqta ul sośial’ çeltär xisabı aşa belderde. Futbolçı 2009nçı yıldan birle 92 tapqır matçqa çığıp 23 gol kertte. Mäsüt Özil Germaniya cıyılma komandası belän 2014nçe yılda Dön’ya çempionatında ciñü qazandı, 2010nçı yılda dön’ya öçençelegen aldı. Tanılğan sportçı sośial’ çeltärdä üzeneñ kitüeneñ säbäplären dä añlattı: “Rasaçılıq häm ixtiramsızlıqqa duçar qaluımnı xis itep torğanda xalıqara däräcädä  Germaniya öçen çığış yasıy almam. Germaniya formasın ğorurlıq häm şatlıq belän kiyä idem, ämma xäzer andıy toyğılarım yuq. Bu qararnı birü bik awır buldı. Çönki härwaqıt komandadağı iptäşlärem, trenerlar häm alman canatarları öçen bar köçemne birä idem. Läkin Germaniya futbol federaśiyäseneñ yuğarı däräcädäge idaräçeläreneñ törek çığışımnı xörmät itmäwläre häm mine ber säyäsi propaganda çarasına äwerelderüläre çıdıy almaslıq noqtağa kiterde. Monıñ öçen min futbol uynamıym. Bu xälgä terälep qarap torırğa cıyınmıym. Diskriminaśiya qabul itelmäs”.

29 yäş’lek futbolçı häm tağın ber törek çığışlı alman sportçı İlkay Gündoğan ilbaşı Räcäp Tayyip Ärdoğan belän oçraşqan ide. Şunnan soñ alarnı Germaniya futbol federaśiyäse başlığı Reynxard Grindel 24nçe iyün’ saylawları kampaniyäsendä çara buluda ğayepläde. Mäsüt Özil monı tänqıyt’läde. “Grindel kebeklär öçen ciñgän waqıtta bez alman, ciñelgändä – törek. Germaniyagä salım tüläw, mäktäplärgä xäyriyä birü, cıyılma komanda belän Dön’ya Çempionatında ciñügä qaramastan, xaman cämäğat’çelek tarafınnan qabul itelmim häm başqa törle mönäsäbät küräm. Alman bulu öçen kiräkle häm mindä bulmağan sıyfatlar barmı? Komandadağı iptäşlärem Lukas Podolski häm Miroslav Klosenıñ alman-polyak dip ataluın işetmädem. Alay bulğaç mine nigä alman-törek dip yörtälär. Törek bulğanım öçenme? Möselman bulğanım öçenme?”-dip yazdı Mäsüt Özil. Anda ul nemeś jurnalistların da telgä aldı. “Futbol uynawımnıñ tänqıyt’länüen qabul itäm, läkin Germaniya mediyasınıñ ikele watandaşlığım öçen mine ğayepläwen häm naçar ütkän Dön’ya Çempionatınıñ xisabın komanda isemennän minnän sorawların qabul itä almam,”-di törek çığışlı alman futbolçı.