2 meñ yıllıq villa tabıldı

Dänizlineñ Buldan ilçäsendä tabılğan Tripolis Antik şähärendäge qazu êşläre waqıtında 2 meñ yıllıq villa kilep çıqtı

1016394
2 meñ yıllıq villa tabıldı

Dänizlineñ Buldan ilçäsendä tabılğan Tripolis Antik şähärendäge qazu êşläre waqıtında 2 meñ yıllıq villa kilep çıqtı. Yort 12 bülmäle. İdäne törle figuralardan toruçı mozaika belän bizälgän.

Tripolis Antik şähäre qazu törkeme citäkçese häm Pamukkalä universitetı arxeologiyä bülege dośentı Baxadir Duman beldergänçä, cirlektä 35 keşe 6 yıldır êşçänlek alıp bara. Êlegräk qazıp çığarılğan ob’yektlarda restavraśiyä yasıylar. Êroziyä näticäsendä barlıqqa kilgän tufraqnı êtaplap çistartırğa tırışalar. Baxadir Duman universitet studentları häm akademik xezmätkärlär belän berlektä êşlärneñ tığız räweştä däwam itüen assızıqlıy. 2012nçe yıldan birle qullarına kergän törle tabıldıqlar ul tirädä kübräk igençelek belän şöğıl’länüçelär yäşäwen dälilli. Ğalim söylägänçä, êlekkege zamannarda da yözem, incir, anar şikelle küp tördä ciläk-cimeş üsterü häm satunıñ kiñ cäyelgän buluı xäzer tağın da açığraq kürenä.          

Antik şähärdä 2013nçe yılda toraq mäydanı buluı añlaşılğan cirlektä êşçänlek başlana. Anın idänendä mozaikalarğa tap bulalar. Arxeologik tikşerenü törkeme bıyıl näq menä şunı qazuğa ähämiyät birä. Toraqqa taba baruçı 5 metr kiñlegendä häm 45 metr ozınlığındağı yul da qızıqlı tabıldıqlar arasında.

Baxadir Duman qazu barğan alannıñ ber mäxällä räweşendä buluın söyli.  Anda 2 meñ yıllıq dip farazlanuçı zinnätle yort ta tabıla. “Bu mozaikalı villanıñ Êllenistik çor axırlarında täwge tözeleş êtabı başlana. Ul 2 meñ yıl êlek bulğan dip äytä alabız. Öyneñ xucası awıl xucalığı säwdägäre bulırğa mömkin. Çönki qazılğan bülmälärneñ idäne mozaika belän yabulı, divarlarında tösle freskalar, üsemlek ornamentları bar,”-dip söyli belgeç. Şunısı qızıq, yortta qullanuılğan kanalizaśiyä sisteması äle xaman êşli. Öydä zur vanna, tualet, zal, yoqı, balalar häm xezmätkärlär bülmäläre bar. Monnan tış, islemay, zäytün mayı şikelle törle sıyıqlıq saqlana torğan kelät tapqannar. Bu isä ğailä bolar belän säwdä itep kön kürgän dip farazlarğa mömkinlek birä.

Baxadir Duman 600 kvadrat metrlı alanda mäxällä buluın, xäzerge waqıtta barı tik ber villanın ğına qazıp çığarıluın belderde. Ul 3-4 yıl êçendä cirlekneñ tulısınça kön yaqtısına açılacağın farazlıy.              



Bäyläneşle xäbärlär