“EXPO 2016 Antalya” açıla

Fälsäfäse “Kiläse buınnar öçen yäşel dönya”, teması “Çäçäk häm bala”, şiğare isä “Kiläçäkne yäşärtü” bulğan EXPO 2016 Antalya iskitkeç tantana belän açılaçaq.

Törkiyä ilbaşı Räcäp Tayyip Ärdoğan, Premyer-ministr Äxmät Dawıtoğlu, çit il däwlät başlıqları, ministrlar, ilçelär häm meñnärçä qunaq qatnaşında uzaçaq räsmi açılış tantanasında onıtılmaz şow quyılaçaq.

Olimpiadalar häm Dönya Kuboğınnan soñ iñ zur çara bularaq qabul itelüçe Dönya Botanika Exposı 191 kön buyı kilüçelärne qunaq itäçäk.

Milli häm xalıqara kongresslar, simpoziumnar, cıyılışlar häm seminarlar uzaçaq EXPO 2016 Antalyada mädäni häm sänğat çaraları da oyıştırılaçaq.

Törkiyä häm ayıruça Antalya öçen däwamlı äsär bulaçaq Expo alanında qatnaşuçı illärneñ baqça mädäniyäte tanıtılaçaq urınnar belän ber rättän Antalyanıñ möhim simvollarınnan berse bulğan tarixi Hadiranus qapqasın simvollawçı Expo manarası, Törkiyäneñ berençe İgençelek häm Biotörlelek muzeyı, 6 meñ 500 keşelek Kongress üzäge, 5 meñ häm 800 keşelek 2 Amfiteatr bulaçaq.

Ayıruça balalar öçen açılaçaq Balalar utrawı, Balalar öçen Fän häm texnologiya muzeyı, ğailälär häm balalar öçen çaralar oyıştırılaçaq Qır alanı, Expo Küle, Expo 2016 Antalyanıñ simvol çäçäge çalmabaş räweşendä terrasa, Expo qalqulığı, Expo urmanı, Expo mäydanı, Mädäniyät häm sänğat uramı belän törek miğmari mädäniyäte çağıldırılaçaq restorannar uramı da bulacaq.

6 ay açıq qalaçaq EXPO alanında bar dönyağa tanılğan rock, pop häm klassik muzıka yoldızları qabul iteläçäk.

Oyıştırılaçaq kontsertlar belän dönyanıñ iğtibarı Antalyağa yünäläçäk.