Awrupa Berlege Rusiyä gazınnan başqa yäşärgä äzerlänä

Awrupa Berlege komissiyäseneñ ênergetika öçen cawaplı äğ’zası Kadri Simson berlekneñ Ukraina tranzit marşrutı aşa täêmin itelüçe Rusiyä gazınnan başqa yäşärgä äzer buluların belderde.

Brüssel’dä Awrupanıñ ênergiyä äyläneşe öçen yasağan adımnarın bäyälägän “Ênergetika berlege -2024” xisabı belän bäyle matbuğat cıyılışı ütkärelde. Simson anda Awrupa Berlegeneñ axırğı 2 yılda yañartıla aluçı ênergiyä qullanuda zur tizlek belän alğa baruın belderep bolay dide: “2024nçe yılnıñ berençe yartıyıllığında cil häm qoyaş ênergiyäsendä yaña rekord yasap êlektr citeşterüdä täwge tapqır qazılma yağulıqlardan uzdırdıq”.

Şulay itep, ul Rusiyäneñ yağulıqlarına distälärçä yıl däwam itkän bäylelekne beterä aluların söyläde. Simson äytüençä, êlek Awrupa Berlege här yıl Rusiyädän 150 milliard kub metr gaz satıp ala ide, xäzer bu 50 milliard kub metrdan azraq. “Rusiyägä bulğan bäylelegebez 2021nçe yılda 45% däräcäsendä ide, uzğan yıl 15%qa töşte”,-dide ul.

Awrupa Berlege gaz saqlağıçların 90%qa turırğan. Bu kürsätkeçkä maqsat itep quyılğan 1nçe noyabr’dän berniçä atna aldan ireşelgän. Simson Awrupanıñ 2022nçe yıl belän 2024nçe yıl arasında gaz qullanunı 18%qa kimetüen assızıqladı. “Rusiyä gazınnan, Awrupanıñ ênergiyä täêminatı iminlegenä zarar birmiçä, êtaplap baş tartu prośessın tögällärgä bez äzer,”-dide ul.  

Simson Awrupada ênergiyäneñ äle haman bik qıybat buluın häm monıñ, bigräk tä Qıtay häm AQŞ qarşında, xalıqara köndäşlek köçenä täêsir itüen dä belderde.