Ukrainadağı aşlıq qaya kitte?

Qara diñgez aşlıq koridorı aşa taşığan yök küläme 15 million tonnadan arttı. Türkiyä transport häm asqorma ministrı Adil Karaismailoğlu bu xaqta yazmaça belderü yasadı. Ul Ukraina häm Rusiyä arasındağı suğışnıñ aşlıq krizisı kiterep çığaruın xäterlätep mondıy mäğ’lümat citkerde: “1nçe avgusttan 25nçe dekabr’gä qadär tulayım 585 korab Ukrainanıñ Odessa, Çernomorsk häm Yujnıy şähärlärendäge portlardan yök töyäp quzğaldı. Alar taşığan yök küläme 15 million 80 meñ tonnadan arttı. Köymälär belän arpa, boday, soya, könbağış çübege, boday körpäse, borçaq, şikär çögendere, üsemlek mayı, kanola orlığı, kukuruz şikelle 13 törle tovar taşıdılar.”  

Karaismailoğlu beldergänçä, 585 korabnıñ 200e Türkiyä bayrağı astında yäisä xucası törek. Ul yöklärneñ 15%ınıñ ilgä kerüen äytte. Ä 12%ı - Afrikağa, 29%ı - Aziyägä, 44%ı isä Awrupağa kitte. Yöklärneñ iñ kübe - 2 million 891 meñ 117 tonnası İspaniyägä cibärelä. İkençe urında Türkiyä, öçençedä - Qıtay.