Rusiyädän kümer satıp alu tıyıldı

Awrupa Berlegeneñ Rusiyädän kümer satıp alunı tıyuçı qararı bügen ğamälgä kerde. Älege sankśiyä paketı aprel’ ayında qabul itelgän ide.

Şulay itep, Rusiyägä här yıl 8 milliard yevro külämendä kerem kiterüçe kanal yabıldı.  Rusiyä kümere häm başqa qatı qazılma yağulıq satıp alu, importlaw yäisä Awrupa Berlegenä kertü monnan soñ tıyıla.

Kümer alu tıyuı - Awrupa Berlegeneñ Rusiyägä qarata ênergetika mäydanındağı sankśiyäläreneñ berençese ide. Annan soñ neft’ importlaw kiläçäk. Anıñ dekabr’ ayında ğamälgä kerüe kötelä.

Rusiyä Awrupa Berlege däwlätlärenä iñ küp kümer cibärüçe il ide.  Ul älege qatı yağulıq êksportınıñ yaqınça 25%ın Awrupağa yasadı.

Awrupa Berlege däwlätläre isä kümer importınıñ 45%ın, êlektr citeşterüdä qullanıluçı termal’ kümerneñ 70%ın Rusiyädän ala ide.

Rusiyä ênergetika ministrlığı mäğ’lümatlarına qarağanda, il 2021nçe yılda Awrupa berlegenä 48,7 million tonna kümer satqan.