Angliyägä çuçqa suyuçı kiräk

Britaniyä duñğız ürçetü assośiaśiyäse mäğ’lümatlarına qarağanda, ildä suyılırğa tiyeşle yaqınça 120 meñ çuçqa bar

1720394
Angliyägä çuçqa suyuçı kiräk

Böyekbritaniya xökümäte Raştua aldınnan duñğız çalu öçen çit illärdän 800 mal suyuçığa êş vizası biräçägen belderde. Çönki bäyräm aldınnan it taläbe arta häm anı qanäğat’länderü awır bula.

Böyekbritaniyä äylänä-tirä moxit, azıq-tölek häm awıl xucalığı ministrı Djordj Yustis bolay dide: “Bez şunı êşlärgä tiyeş – mal suyuçı häm it kisüçelärgä sezonlı êşçe programması qısalarında 6 ayğa qadär waqıtlıça ilgä kerergä röxsät birergä”.

Ministr äytüençä, Angliyädä duñğız çalu häm it kisüdä êşläwçe bik küp Awrupa Berlege watandaşı koronavirus kizüe arqasında illärenä qaytıp kitkän häm qabat kilmägän.

Britaniyä duñğız ürçetü assośiaśiyäse mäğ’lümatlarına qarağanda, ildä suyılırğa tiyeşle yaqınça 120 meñ çuçqa bar.

Bilgele bulğança, Angliya Breksit kileşüe belän Awrupa Berlegennän çıqqannan soñ bik küp tarmaqta täêminat häm citeşterü probleması kilep tudı. Monıñ säbäbe kvalifikaśiyäle xezmätkärlärneñ citmäwe. Belgeçlär ildä yök taşu şofyerlarınıñ tulı sanınıñ xäzerge waqıtta ixtiyac bulğannan yaqınça 100 meñgä kimräk ikänen söyli. Angliyädä import tovarlar portlarda cıyılıp tora başlağan, alarnı taratu waqıtında başqarılmıy.

Britaniya xökümäte uzğan ayda çit illärdän 5 meñ yök maşinası yörtüçe häm 5 meñ 500 tawıq ürçetü tarmağı xezmätkärenä 3 aylıq waqıtlıça viza bireläçägen beldergän ide.



Bäyläneşle xäbärlär