Baylar salımnarın arttırırğa quşa

Dön’yadağı iñ baylar arasında urın alğan 83 keşe xökümätlärgä möräcäğat’ itep, koronavirus kizüeneñ iq’tisadi yoğıntısı belän köräş öçen salımnarınıñ arttırıluı kiräklegen citkerde.

Urtaq açıq xatnı imzalawçılar arasında Uolt Disney kompaniyäsen tözüçelärneñ berse Roy O. Disneynıñ onığı Êbigeyl Disney, tuñdırma häm konfet çılbırı “Ben ve Djerri”nı ğamälgä quyuçı Djerri Grinfild häm Angliya sśenaristı, prodyusser häm rejissyer Riçard Kyortis bar. Alar xökümätlärneñ baylarğa salımnarın arttıruın sorıy.

“Bez reanimaśiyädä awırularnı qaramıybız. Bez aşığıç yärdäm belän awırularnı xastaxanägä taşımıybız. Bez kibet kiştälären tezüçe, keşelärgä rizıqların işeklärenä iltüçe tügel. Ämma bezneñ aqçabız bar. Häm bik küp. Bu aqçağa xäzerge waqıtta bik citdi räweştä ixtiyac bar häm aldağı yıllarda da bulaçaq,”-diyelä xatta.  

Anda kizüneñ iq’tisadi zararınıñ distälägän yıllar däwam itä aluı assızıqlana, yartı milliardtan kübräk keşeneñ xäyerçelekkä yöz totuı äytelä. Xatta mondıy yullar bar: “Xökümätlärneñ liderları kiräkle finanslarnı tabu öçen cawaplılıq alırğa häm bu çığanaqlarnı ğadel räweştä qullanırğa tiyeş”.