Tel belmäwçegä sośial’ yärdäm yuq

Norvegiyädä cirne telne belmäwçelärgä xökümät yärdäm itmäyäçäk

Tel belmäwçegä sośial’ yärdäm yuq

Norvegiyädä 2020nçe yıldan başlap sośial’ yärdäm alu öçen cirle telne belü şart itep quyılaçaq. Bu xaqta xökümät räise Êrna Solberg belderde. Ul ber gazetağa interv’yusında moxtaclarğa sośial’ yärdäm kürsätüdä tağın da qırıs şartlar quyılaçağın açıqladı. Şularnıñ berse - norvegiyälelärneñ telen belü.

Xökümät räise fikerençä, tel öyränü şartı qaçaqlarnı êş êzlärgä êtäräçäk.

Sośialist sulçı partiyä süzçese Karin Andersen isä Solbergnıñ qararına rizasızlıq belderde. “Aşarğa alırğa aqçası bulmağan keşelärne yärdämnän mäxrüm itä almaslar. Norvegiyälelär telen belmägän qart häm awırular açlıqtan ülergä tiyeş dip sanıymı?” -dide ul.

Norvegiyä xökümäte tarafınnan 2017nçe yılda täêmin itelgän 6,6 milliard kronlıq sośial’ yärdämne aluçılarnıñ yartısı qaçaqlar buluı açıqlandı. Alarnıñ 86%ı Yaqın Könçığış häm Afrikadan kilüçelär.

Statistikağa qarağanda, 5 million 200 meñ keşe yäşäwçe ildä 130 meñnän artıq sośial’ yärdäm aluçı bar. 2017nçe yılda Norvegiyädä 880 meñnän artıq çit il çığışlı şäxes isäplängän. Bu ildäge xalıqnıñ yaqınça 17%ın täşkil itä.   



Bäyläneşle xäbärlär