Germaniyada toraq satuda çikläwlär

Germaniyanıñ Berlin töbäge xakimiyäte başlığı Maykl Müller toraq bäyäläreneñ artuı näticäsendä öyle bulunıñ qıyınlaşuın belderep, çit il keşelärenä yort satuda çikläwlär kerteläçägen äytte. Bu xaqtağı reportaj “Frankfurter Allgemeine Zeitung” gazetasında basıldı. Anda Müller Berlin finans oyışmasınıñ toraq bazarındağı spekulyaśiyälärgä çik quyu öçen tikşerenülär ütkärüen söyli. Ul misalğa Yaña Zelandiyada çit il keşelärenä toraq satunı çikläwlären kiterä häm şunı uq Berlinda da kertergä cıyınuların äytä. 2015nçe yılda şähärdäge öylärneñ 68%ı çit il keşelärenä satılğan. Bu san 2009nçı yılda barı tik 14% bulğan. Germaniya külämendä toraqlarnıñ 40 %ı häm kommerśiya küçemsez milegeneñ 60% xalıqara investorlarğa satıldı. 4 millionğa yaqın xalqı bulğan Berlin iñ aktiv mölkät bazarına iyä şähärlär isemlegendä.