Êyr Fransnıñ yuqqa çığuı bar

Franśiyanıñ milli hawa yulı şirkäte Êyr Fransnıñ yuqqa çığu mömkinlege bar. Bu xaqta ilneñ iq’tisad ministrı Bruno Le Mêr belderde. Êyr Frans xezmätkärläreneñ êş taşlawına yaqınça 2 ay yarım buldı. Alar tüläwlärneñ artuı häm êş şartlarının yaxşıruın teli. Le Mêr, xezmätkärlärgä möräcäğat’ yasap, idarä täq’dim itkän xaqlardan tağın da artığın soramasqa çaqırdı. Ul, şulay uq, şirkätkä betü qurqınıçı yanawın  häm kiçekmästän köndäşlek öçen adım atarğa kiräklegen söyläde.

Êş taşlawlarnıñ başında Franśiyanıñ 11 hönäri berlege tora. Alar xezmät xaqın 6%qa arttırunı taläp itä. Êş taşlawlar bilgele könnärdä ütä.

 Şirkät xezmät xaqına küpmeder külämdä östämä täq’dim itkän ide. Ämmä êşçelär tawış birü yulı belän annan baş tarttı. Şunnan soñ Êyr Fransnıñ başqarma direktörü Jan-Mark Yanayyak ütkän comğada êştän kitüe turında belderde.

Şirkät citäkçelege mäğ’lümatlarına kürä, êş taşlawlardan kilgän zarar 269 million awro külämendä. Ägär rizasızlıq çaraları bu ayda da däwam itsä, bu sannıñ kimendä 300 million bulacağın farazlıylar. Belgeçlär şirkätneñ kiläçäge öçen borçıla. Çönki cäyge yallar waqıtına alınğan biletlarnı kire birülär yışayğan.