Qıtay şirkäte Xäbäşstanda gaz yatmasın tapqan

Xäbäşstannıñ (Êfiopiyanıñ) Somali vilayätendä tabiği gaz häm neft’ êzläwçe Qıtaynıñ “POLY-GCL” şirkäte yaña rezervlar tapqan.

Xäbäşstan (Êfiopiya) cirastı yatmaları, neft’ häm gazdan cawaplı däwlät ministrı Koang Tutlam cirle matbuğatqa yasağan belderüendä vilayättäge dälillängän 4,7 trillion kub fut tabiği gaz rezervınıñ Calub gaz mäydannarında tabılğan yaña çığanaqlar belän 6 belän 8 trillion kub futqa citüen äytkän.

Şirkätneñ tabiği gaz belän ber rättän Hilala töbägendä neft’ tä tabuın belderüçe Tutlam tabılğan neft’neñ küpme miqdarda buluınıñ älegä bilgelänmäwen, êşçänlek tögällängännän soñ mäs’älä belän bäyle mäğ’lümat biräçäklären assızıqlağan.

Addis Ababa citäkçelege Calub häm Hilala qırlarında monnan alda bilgelängän häm Qıtaynıñ “POLY-GCL” şirkäte êşläp çığaraçaq 4,7 trillion kub fut tabiği gaznı salınaçaq ütkärgeç belän Cibutigä qudırunı häm LNG bularaq Qıtayğa êksportlawnı planlaştıra.

Xäbäşstan (Êfiopiya) häm Somali arasında 1977nçe-1978nçe yıllarda yäşängän suğış häm annan soñ ilneñ Somali vilayätendä barlıqqa kilgän tınıçsızlıqlar arqasında il yıllar buyı inde töbäktäge gaznı çığara almıy.