YUNESKO Dön'ya mirası isemlegendä Törkiyädän 19 ob’yekt

Belengäne kebek, Anadolunıñ dürt ber yağında meñnärçä yıllıq tabiğıy häm mädäni miras urnaşqan. Qayberäwläre şul çaqlı qıymmätle, xätta “YUNESKO”nıñ Dön’ya mirası isemlegenä kertelde. Uzğan atnada Törkiyäneñ YUNESKO Dön’ya miras isemlegendäge ob’yektları arasında urnaşqan İstanbul, Divriği Olı cämiğı häm Darüşşifası, Hattuşa (Boğazköy), Nämrut tawı häm Xanthos-Letoon turında süz alıp barğan idek. Bügen isä şuşı ob’yektlarnıñ däwamı turında süz alıp barırbız.

Törkiyäneñ YUNESKO Dön’ya mirası isemlegendäge ob’yektlarınnan berse - Safranbolu. Qarabükneñ Safranbolu ilçäse – tradiśion şähär üzençälege, ağaçtan yasalğan yortları häm monumental’ qorılmaları belän böten kileş tıyulıq bularaq iğ’lan itelgän siräk urınnardan berse. 14nçe ğasırda töreklärneñ xakimiyätenä küçkän Safranbolu 1994nçe yılda YUNESKO Dön’ya mirası isemlegenä kerde.

Törkiyäneñ YUNESKO Dön’ya mirası isemlegendäge ob’yektlarınnan başqa berse - Troya borınğı qalası. Uzğanlığı irtä bronza çorına barıp totaşqan Troya borınğı qalası Çanakkalädä urnaşqan. Dön’yanıñ iñ mäşhür borınğı şähärlärennän berse bulğan Troyada ütkärelgän qazılmalarda şaqtıy śivilizaśiyägä qarağan qaldıqlar tabıldı. Arxeologik êşçänlek äle dä alıp barılğan borınğı qala här yıl küp sanda cirle häm çit il turistın qabul itä. Troya 1998nçe yılda YUNESKO Dön’ya mirası isemlegenä kertelde.

Sälimiyä mäçete häm qolliyäte dä Törkiyäneñ YUNESKO Dön’ya mirası isemlegendäge qorılmalardan berse. Mimar Sinannıñ ostalıq äsäre Sälimiyä mäçete häm qolliyäte Ädirnäneñ iñ möhim monumental’ qorılmalarınnan berse. 16nçı ğasırda Soltan 2nçe Sälim isemennän yasattırılğan mäçet texnik qamillege, ülçämnäre häm êstetik üzençälekläre belän ul çornıñ iñ iskitkeç äsärläre arasında isäplänelä. 2011nçe yıldan birle YUNESKO Dön’ya mirası isemlegendä.

Çatalhöyük neolit şähäre: Keşelek dönyasınıñ utraq cämğiyävi tormışın yaqtırtuçı Çatalhöyük neolit şähäre Kon’yada urnaşqan. 2 meñ yıldan kübräk uzğanlığı belän awıllardan şähär tormışına küçüneñ möhim dälile bulğan Çatalhöyük 2012nçe yılda YUNESKO Dön’ya mirası isemlegenä kertelde.

Bergama küpqatlamlı mädäni landşaft: İzmirdä urnaşqan Bergama küpqatlamlı mädäni landşaft êllinistik, Rim, Könçığış Rim häm Ğosmanlı däwerlärenä qarıy. Üz çorınıñ iñ möhim sälamätlek saqlaw üzäklärennän Asklepion da urnaşqan Bergama 2014nçe yılda YUNESKO Dön’ya mirası isemlegenä kerü xoquqın yawladı.

Bursa häm Cumalıqızıq: Bursa häm Cumalıqızıq YUNESKO Dön’ya mirası isemlegenä 2014nçe yılda kertelde. Monı täêmin itkän isä Orhangazi qolliyäten häm tirä-yağın üz êçenä alğan Xannar töbäge, Hüdavendigar qolliyäte, Yıldırım qolliyäte, Yäşel qolliyät, Muradiyä qolliyäte häm Cumalıqızıq awılı buldı.

Diyarbaqır qal’ğası häm Hävsäl baqçaları: Diyarbaqır qal’ğası häm Hävsäl baqçaları mädäni landşaftı 2015nçe yılda YUNESKO Dön’ya mirası isemlegenä kertelde.  Diyarbaqır şähär divarları häm Hävsäl baqçaları belän bergä ike töp öleştän toruçı mäydan dönya mädäniyäte öçen möhim miras.

Çığanaq: TRT Xäbär