Törek şirkäte AQŞqa yärdäm täq'dim itte
Yanğınnarnı buldırmaw ısulı uylap tapqan oyışma Los-Anjelestağı utqa qarşı köräşergä äzer

Amerika Quşma Ştatlarınıñ Los-Anjeles şähäre häm tiräsendä şaqtıydan birle däwam itkän yanğınnarda ğomere özelüçelärneñ sanı 25kä citte. 7nçe ğıynvar kiçendä başlanğan utta 40 meñ gektardan artıq mäydan kölgä äwerelde. Hawa şartları da afätne kontrol’ astına alunı qıyınlaştıra.
150 meñnän artıq keşe öçen êvakuaśiyä kürsätmäse çıqtı, 12 meñnän kübräk qorılma zıyan kürde.
Süz uñayınnan, ber törek tikşerenü şirkäte AQŞqa yanğınğa qarşı köräşüdä yärdäm itü täq’dime yasadı. Oyışma Törkiyäneñ Balıkäsir töbägendä “Taş suı” dip ataluçı proyekt tormışqa aşıra. Anı dön’yadağı iñ köçle yanğın sünderüçe dilär. Ul üzeneñ êkologik çista strukturası häm näticälelege belän iğ’tibarnı cälep itä. “Taş suı”nıñ iñ ähämiyätle üzençälege - ul qullanılğan urında qabat yanğın çıqmawı.
Şirkätneñ citäkçese Faruq Durukan “Ägär AQŞ teläsä, bez yärdämgä barırğa äzer” dip belderde.