Bäşşar Äsäd Mäskäwdä

Rusiyä Süriyäneñ tüntärelgän liderı Bäşşar Äsädneñ ilen taşlap kitüe turında beldergän arada, qayber çığanaqlar anıñ häm ğailäseneñ Rusiyädä buluın citkerde.

Rusiyä tışqı êşlär ministrlığınnan yasalğan belderüdä Süriyädäge axırğı waqıyğalarğa bäyä birelde. Anda älege ildäge wäzğıyät’neñ “dramatik häm borçu tudıruçı” buluı, Äsäd häm qorallı bäreleşlärdä qatnaşqan yaqlar arasında söyläşülär uzuı alğa sörelä. Yänäse, älege söyläşülär näticäsendä Äsäd xakimiyätne tınıç yul belän tapşıru kürsätmäse birä häm wazıyfasınnan kitä.

Rusiyä xäbär agentlığı “TASS” citkergänçä, Äsäd häm ğailäsenä sıyınu xoquqı täq’dim itelä. Xäzer alar Mäskäwdä.

İsegezgä töşeräbez, Süriyädä 27nçe noyabr’dä rejim köçläre häm oppoziśiyä törkemnäre arasında bäreleşlär başlandı. 7nçe dekabr’dä oppoziśiyä başqala Dimäşq’qa kerä başladı. Alarğa cirle xalıq massaları da yärdäm kürsätte. Näticädä rejim bärep töşerelde. Şulay itep, Baas partiyäseneñ ildäge 61 yıllıq xakimiyäte tögällände. Rejim liderı Bäşşar Äsäd ildän qaçtı.