Netan'yaxu ministrlarnıñ telefonnarın tıñlağan

İzrailneñ êçke küzläw xezmäte “Şabak”nıñ êlekkege mödire Yoram Koên wazıyfasında waqıtta xökümät räise Bin’yamin Netan’yaxunıñ aña ministrlar häm iminlek wäqalätleläreneñ telefon söyläşülären tıñlaw kürsätmäse birüen açıp saldı. Ul bu xaqta İzrail däwlät media kompaniyäse “KAN”nıñ radiosında söyläde.

Yoram Koên äytüençä, Bin’yamin Netan’yaxu ber iminlek utırışınnan soñ, yäşeren mäs’äläneñ tışqa çığa aluına borçılıp, cıyılışta qatnaşqan ministr häm iminlek wäqalätleläreneñ telefonnarın tıñlarğa quşa.

İzrail xökümät yortı Koênnıñ älege süzlären tulısınça kire qaqtı häm anı “uydırma waqıyğa barlıqqa kiterergä mataşuda” ğayepläde. Belderüdä Netan’yaxunıñ ähämiyätle däwlät seren saqlarğa mataşuı häm qanunnarğa nigezlänep êşläwe alğa sörelde.