Netan'yaxu Ğazzädä tınıçlıq urnaşuın telämi

İzrail xökümäte räise Bin’yamin Netan’yaxu Ğazzädä höcümnärne tulısınça tuqtatu turındağı kileşüne qabul itmäyäçägen belderde. Ul cirle telekanalğa interv’yusında AQŞ häm Franśiyä aradaşçılığında Livanda utnı tuqtatu häm Ğazzädä dä tınıçlıq urnaştıru mömkinlege turında söyläde.

Netan’yaxu Ğazzä sızığında tulısınça utnı tuqtatuğa qarşı buluın, barı tänäfes birä aluın assızıqlıy. “Äsirlärne irekkä çığaru öçen Ğazzädä utnı tuqtatıp torırğa min äzer”,-di ul häm “Xamas” belän äsir almaşu kileşüe tözü öçen şartlarnıñ kübeseneñ yaxşıruın alğa sörä.

Bin’yamin Netan’yaxu Livandağı şartlarnıñ Ğazzädägedän ayırılıp toruın, “Xamas”nı yuq itärgä, ä “Xizbulla”nıñ qabat qorallanuına yul quymasqa tırışuların söyläde. Ul Livandağı utnı tuqtatu çorınıñ qısqa bulaçağın alğa sörä. Netan’yaxu İzrail armiyäsenä, “Xizbulla” kileşüne bozğan oçraqta, köçle höcümgä äzerlänü kürsätmäse birgän.  

Ul AQŞtan ilenä qoral cibärelü mäs’äläsenä dä tuqtaldı häm yaña saylanğan ilbaşı Donal’d Trampnıñ üzenä bu êştä monnan soñ kiçegülär bulmayacağın anıq räweştä äytüen assızıqladı.