"Kassam brigadaları" İzrail ğaskärlären utqa tottı

“Xamas”nıñ qorallı flangı “İzzäddin äl-Kassam brigadaları” Ğazzä sızığınıñ tön’yağında İzrail köçlärenä höcüm itte. Alar Cibaliya möhacir lagerında ber yortta yäşerengän izraille ğaskärilärne raketa belän utqa totuların, ülüçelär yäisä yaralanuçılar barlığın belderde. Monnan tış, Ğazzä şähärendä dä İzrail ğaskärläre nişanğa alına.

İzrail armiyäsennän älegä bu xaqta belderü yasalmadı.

İzrailneñ 2023nçe yılnıñ 7nçe oktyabrennän birle Ğazzä sızığına höcümnärendä yaqınça 17 meñ 210ı bala, 11 meñ 742se xatın-qız - barlığı 43 meñ 341 fälästinle hälaq buldı, 102 meñ 105e yaralandı. Cimereklär astında äle haman meñnärçä üle buluı belderelä.