Gaitida bandalar qulınnan 3 meñ 900 keşe ülde

Gaitida torğan sayın artuçı köç qullanu waqıyğaları arqasında 700 meñnän artıq keşe yäşägän cirlären taşlap kitte.

BMO xalıqara migraśiya oyışması sośial’ mediada älege ildäge wäzğıyät’ turında yazma urtaqlaştı. Anda Gaitida härkemgä tınıç häm layıqlı tormış täêmin itü öçen berdämlekkä çaqıru yasaldı.  

BMO Gaiti integraśiya ofisı mäğ’lümatlarına qarağanda, 2024nçe yılnıñ başınnan birle 3 meñ 900 keşe qorallı bandalarnıñ höcümnäre näticäsendä ülgän. Alarnıñ 1374e axırğı 6 ay êçendä bula.  

Gaiti ozaq yıllar däwam itüçe säyäsi, iq’tisadi häm iminlek problemaları belän köräşä. 11 millionnan artıq xalqı belän il, şul uq waqıtta, qıtlıq yanawına da duçar.  

Gaiti başqalası Port-o-Prensneñ yaqınça 80%ın qorallı bandalar üz qulında tota.