Fukusima atom-töş stanśiyäsennän robot ürnäk aldı

Yaponiyada Fukusima atom-töş stanśiyäsennän täwge tapqır robot yärdäme belän êregän qatı yağulıq ürnäkläre alındı. Bu xaqta stanśiyäne êşlätüçe Tokio êlektr ênergiyäse şirkäte belderde.

“Kyodo News”nıñ xäbärenä qarağanda, çuyırtaşqa oxşağan yaqınça 5 millimetr diametrındağı atom-töş yağulıq ürnäge reaktornıñ berençel saqlaw qabığı astınnan alınğan. Soñınnan robotnı metal ärcägä quyıp alıp kitälär.

Stanśiyädän alınğan kisäk nurlanış däräcäsenä qarap ürnäk täcribälärdä qullanılaçaq yäisä başqası belän almaştırılaçaq. Êşlär xezmätkärlärneñ nuırlanışqa duçar buluların minimumğa töşeräçäk räweştä alıp barıla.

Şirkät, täcribälär ütkärep, 1nçe stanśiyädä êrü hälakäte waqıtında reaktorlarda buluı uylanıluçı yaqınça 880 tonna atom-töş yağulığınıñ qabat qullanu mömkinlegen açıqlarğa tırışa.

İsegezgä töşeräbez, 2011nçe yılnıñ 11nçe martında Yaponiyädä bulğan 9 ball zurlığındağı cir teträw häm şunnan soñğı śunami Fukusima atom-töş stanśiyäsennän radiaśiyäneñ sarquına kiterde. Töbäktä yäşäwçe distälärçä meñ keşe öylären taşlap kitärgä mäcbür buldı.

Sarqunı tulısınça tuqtatu häm stanśiyäne likvidaśiyäläw öçen tağın distälägän yıllar kiräk bulaçağı farazlana.