Klimat üzgärü kisken hawa şartların arttırdı

Ğalimnär keşelärgä bäyle klimat üzgärüneñ axırğı 20 yılda kisken hawa torışı waqıyğalarınıñ yışlığın arttıruın açıqladı.  

BBCneñ xäbärenä qarağanda, London patşa kolledjı belgeçläre ütkärgän tikşerenüdä kisken hawa şartlarınıñ klimat üzgärü belän bäyläneşe qarala. Alar axırğı 20 yıldağı iñ köçle 10 şundıy waqıyğa belän bäyle mäğ’lümatlarnı küzdän kiçerä. Mäsälän, Somalida yözlärçä meñ keşegä täêsir itkän qorılıq häm Franśiyädä 3 meñnän artıq keşeneñ ülemenä säbäpçe bulğan êsselek dulqınnarı.

Ğalimnär, tikşerenü näticäsendä, bu hawa torışı waqıyğalarınıñ keşe êşçänlege belän bäyle klimat üzgärü säbäple tağın da intensiv xälgä kilüen häm ixtimallığı tağın da artuın açıqladı.  

“Bu tikşerenü dön’yanı cılıtuçı häm keşe ğomerlärenä zarar birüçe qazılma yağulıqlarğa totınuın däwam itüçe säyäsi liderlar öçen yullama bulırğa tiyeş,”-dide älege tikşerenüdä qatnaşqan êkologiyä belgeçe Frederik Otto.