Ber yıllıq yañğır 8 säğat' êçendä yawdı

İspaniyädä köçle yawım-töşem häm dawıl kiterep çığarğan su basu hälakätendä ülüçelär sanı 158gä citte. Alarnıñ kübese ilneñ könçığışındağı Valensiyä töbägendä. Cirlektä 155 keşeneñ üle gäwdäse tabıla. 

Su basulardan zarar kürgän tağın ber töbäk Kastil’ya-La Mançada ğomere özelüçelärneñ 3 buluın citkerälär. Wäqalätlelär ülüçelärneñ sanı artaçağına borçıla, çönki yuqqa çıqqan sanaluçılar bik küp.

Saqlanu ministrlığı hälakät töbägendä êzläw-qotqaru êşçänlekläreneñ däwam itüen belderä.

Valensiyädä xäzerge waqıtta 150dän artıq yul xäräkät öçen yabıq, Madrid-Valensiyä poyızd säfärläre kimendä 15 köngä tuqtatılğan. Su häm azıq-tölek problemaları bar. 100 meñgä yaqın keşe êlektrsız qalğan.

İspaniya däwlät meteorologiyä oyışması Valensiyädäge tabiğıy afätne “yöz’yılnıñ iñ naçar çorı” dip bäyäläde. Monıñ älegä qadär hiç kürelmägän külämdäge yawım buluın, ğadättä 1 yılda yawuçı yañğırnıñ 8 säğat’ êçendä töşüen citkerdelär.  

Xökümät räise Pedro Sançes Valensiyägä barıp zıyannı üz küzläre belän kürde. Ul däwlätneñ barlıq mömkinlekläreneñ mobilizaśiyälänüen, êzläw-qotqaru êşlärenä östenlek birelüen, naçar hawa şartlarınıñ qayber urınnarda däwam itüe öçen qurqınıçsızlıq çaraların onıtmasqa kiräklegen belderde.