AQŞnıñ Süriyädäge bazalarına höcüm ittelär

Süriyäneñ Xumus häm Däyrizor töbägendä AQŞ köçläre urnaşqan Tänäf belän Ömär neft’ mäydanı xärbi bazalarına kamikadze keşesez hawa apparatları belän höcüm yasaldı. Dronnarnıñ kemneke buluı bilgesez.

Cirle çığanaqlardan alınğan mäğ’lümatlarğa qarağanda, säğat’ 22.30 tiräsendä Däyrizorda Färat yılğasınıñ könçığışında Ömär neft’ çığaru mäydanındağı baza dronnar belän nişanğa alına. Şunnan soñ sirena tawışları işetelä, AQŞ xärbi oçqıçları kükkä kütärelä. Alar İran yaqlawındağı suğışçan törkemnär urnaşqan awıllarnı utqa tota.

Monnan tış, Xumus töbägendäge çüldä AQŞnıñ Tänäf bazasına kamikadze dronnar höcüm itä.

İke bazada da zıyan kürüçelär turında mäğ’lümat yuq.

Süriyädä soñğı waqıtta Tänäf töbäge, Ğıyraq çigenä yaqın Malikiyyä rayonı, Xasäkädäge Şäddadi rayonı häm Däyrizordağı AQŞ armiyäse urnaşqan bazalar qayan kilüe bilgesez dronnar belän utqa totıla.