Poliomiyelit qabat baş kütärde

Yämändä axırğı 3 yılda 273 balada poliomiyelit oçrağı terkälde.

Bötendön’ya sälamätlek saqlaw häm Berläşkän Millätlär oyışmalarınnan yasalğan belderülärgä qarağanda, moña gumanitar krizis häm vakśinaśiya däräcäseneñ tübän buluı säbäpçe.  

Mäğ’lümatlar kürsätkänçä, poliomiyelit Yämändäge balalarnıñ tormışına yanawın däwam itä. Balalarğa yärdäm fondı awırunıñ ğomerlek, däwalaw mömkin bulmağan fälecä yäisä ülemgä kiterüen, monı barı vakśina yulı belän kirtäläw mömkin ikänlegen citkerä.

Belderüdä äytelgänçä, 2020nçe yılğa qadär Yämän poliomiyelittan qotıla. Tik bäreleşlär arqasında sälamätlek saqlaw sistemasınıñ zäğıyf’länüe, sośial’, säyäsi häm iminlek krizisı näticäsendä 2022nçe yılda vakśinalaw däräcäse - 58%qa, 2023tä 46%qa töşä.