Qurqınıç yanğınnıñ qorbannarı 181gä citte

Nigeriyanıñ tön’yağındağı Jigava töbägendä sıyıq yağulıq taşuçı tankernıñ şartlawı näticäsendä ğomere özelüçelärneñ sanı 181gä citte. Cirlekneñ gubernatorı Umar Namadi 16nçı oktyabr’dä bulğan älege waqıyğa turında söyläşü öçen däwlät başlığı Bola Äxmät Tinubu belän oçraştı. Şunnan soñ ul jurnalistlarğa belderülär yasadı.

Namadi 181 keşeneñ ülüen, 80 keşeneñ äle haman däwalanuın, şartlawnıñ 210 ğailägä täêsir itüen söyläde.

İsegezgä töşeräbez, 16nçı oktyabr’dä Nigeriyanıñ Kano-Xadeşa yulında yağulıq taşuçı tanker tizlegen arttırğanda kontrolen yuğalta häm äylänä. Cirle xalıq anıñ yağulığın buşatırğa mataşqanda ul şartlıy. Bik küp keşe yanıp ülä.

Däwlät başlığı Bola Äxmät Tinubu, älege waqıyğadan soñ, il külämendä yağulıq taşu iminlege qağıydälären här’yaqlap küzdän kiçerü kürsätmäse birde.