Ukraina atom-töş qoralı çığarırğa mömkin

Ukrainanıñ berniçä atna êçendä Rusiyä armiyäsenä qarşı qullanu öçen atom-töş qoralı yasap çığara aluı alğa sörelä. Bu xaqta Germaniyäneñ “Bild” gazetınıñ qoral täêminatı tarmağında êşläwçe ukrainalı wäqalätleneñ süzlärenä nigezlänüçe xäbärendä äytelä.

Gazetta wäqalätleneñ: “Kiräkle komponentlar häm belemebez bar. Ägär kürsätmä birelsä, berençe bombanı yasaw barı berniçä atna waqıt alır”,-digän süzläre urın ala. Bu belderü berniçä ay êlek yabıq ber brifingta yañğırağan.

Xäbärdä bu sśenariynıñ, Ukrainanıñ NATOğa kermäyäçäge çınbarlığın häm Rusiyä armiyäseneñ aldağı ğamällären isäpkä alıp, bäreleş çişelgännän soñğı çor öçen äzerlänüe äytelä.  

Monnan alda Ukraina liderı Volodimir Zelenskiy Awrupa Şurası cıyılışınnan soñ jurnalistlarğa bolay dip beldergän ide: “Ukrainanıñ qarşında ike yul bar: yä atom-töş qoralına iyä bulaçaq yäisä NATOğa keräçäk. Monı AQŞqa säfäremdä Donal’d Tramp belän söyläşüdä dä telgä aldım”.