46 million bala uqırğa bara almıy

Afrikanıñ üzäge häm könbatışında çiktän tış köçle yawım-töşemnär arqasında yaqınça 10 million bala mäktäpkä bara almıy.

Xalıqara gumanitar yärdäm oyışması “Save The Children” (Balalarnı qotqarığız) beldergänçä, Niger, Nigeriya, Mali häm Kongo demokratik cömhüriyätendä su basular häm taşqınnar 1 millionğa yaqın keşene öylären taşlap kitärgä mäcbür itte.

Yañğırlar mäktäp binalarına citdi zarar kiterä, qayberläre cimerelä. Öylären taşlap kitüçelärneñ kübese uqu yortlarına sıyınğan bula.

Su basulardan iñ zur zıyan kürgän Malida mäktäplär - 1 ayğa, Nigerda 3 atnağa soñraq açılaçaq.

Belderüdä 4 däwlättä bäreleşlär häm yarlılıq säbäple xäzerge waqıtta 36 million balanıñ belem aluın däwam itä almawı, su basular arqasında älege sanğa tağın 10 million balanıñ östälüe äytelä.