İzrail tön'yaq fronttağı suğış planın rasladı

İzrail ğomumştab başlığı Xerśi Xalevineñ tön’yaqtağı suğış planın raslawı citkerelde. Armiyäneñ matbuğat xezmätennän belderülärençä, şulay itep, suğışnıñ däwam itäçäge yünäleş açıqlandı.

Xerśi Xalevi “Xizbulla” belän bäreleşlär baruçı tön’yaq front nisbätennän monnan aldağı könne yasağan belderüendä: “Här êtapta “Xizbulla” bik awır cawap biräçäk”,-dide.

İsegezgä töşeräbez, Livanda 17nçe häm 18nçe sentyabr’dä “Xizbulla” qullana torğan êlemtä caylanmaları şartlatıldı. Älege höcümnärdä 37 keşe ülde, meñnärçä keşe cäräxätlände.

Livanlı wäqalätlelär monıñ öçen cawaplı itep kürsätkän İzraildän älegä bernindi belderü bulmadı.