İzrail Livanda peydjerlarnı şartlattı

İzrailneñ Livanda “Xizbulla” xäräkäte äğ’zaları qullana torğan peydjerlarnı şartlatuı näticäsendä 9 keşe ülde - berse 8 yäş’lek bala. 2 meñ 800 keşe yaralandı. 200eneñ xäle ayıruça awır.

Livan sälamätlek saqlaw ministrı Firas äl-Äbyad ilneñ törle urınnarında bulğan şartlawlar näticäsendä xastaxanälärdäge aşığıç yärdäm bülekläreneñ bik küp yaralı qabul itüen citkerde. Barlıq mediśina xezmätkärlären êş urınnarına kilergä çaqırdılar. Yaralanuçılar häm ülüçelär arasında “Xizbulla” äğ’zaları ğına tügel, grajdanlılar da bik küp. 

Livan xökümäte peydjerlarnıñ şartlatıluın ğayepläde häm monıñ milli suverenlıqnı bozu buluın belderde. İl citäkçelege kiçekmästän barlıq bäyläneşle illär häm BMO belän êlemtägä kergän.

“Xizbulla” älege şartlatuda İzrailne ğayeple itep kürsätte häm moña cawap biräçäklären citkerde. 

İldä qayber peydjerlarnıñ xucaları östendä şartlawı mizgelläre sośial’ mediada da kürende. Signal kilügä keşe anı qulına ala häm şul waqıtta cihaz şartlıy.

İran xäbär agentlığı “Fars” citkergänçä, şartlawda İrannıñ Bäyruttağı ilçese Ämani da yaralanğan.

İzrail iminlek wäqalätleläreneñ älege waqıyğalardan soñ kiyerenkelek artu säbäple aşığıç räweştä cıyıluı citkerelde. Livandağı höcümnärgä qarata İzrail räsmi dairäläreneñ bernindi belderü yasamawı iğ’tibarnı cälep itä. “KAN” kanalındağı xäbärdä äytelgänçä, Xökümät yortı ministrlarnı Livandağı şartlawlar belän bäyle açıqlaw yasamaw turında kisätkän.