V'yetnamda "Yagi" tayfunınıñ qorbannarı

V’yetnamnıñ tön’yağında xakimlek itüçe “Yagi” öyermäse kiterep çığarğan afät häm hälakätlärdä ülüçelärneñ sanı 87gä citte.

“VN Express” xäbär säxifäsenä qarağanda, wäqalätlelär 750 keşeneñ yaralanuın, yuqqa çıqqan 70 keşene êzläwneñ däwam itüen belderä. Afättä 48 meñnän artıq yort zarar kürgän. Meñnärçä gektar basular su astında qalğan.

 V’yetnam afätlärne buldırmaw häm kontrol’dä totu idaräse ilneñ tön’yağında bik küp yılğanıñ taşu çigenä yaqınlaşuın citkerä.

V’yetnam xökümät räise Fam Min’ Çin’ “Yagi” öyermäse zıyan salğan Xayfon şähärenä bardı häm yaqınça 4 million dollarlıq yärdäm paketın rasladı.

Filippinnarnıñ tön’yaq töbäklärenä 3nçe sentyabr’dä bärgän “Yagi” öyermäse arqasında 20 keşeneñ ğomere özelde, 26 keşe yuğaldı.

Qıtayğa isä ul 7nçe sentyabr’dä kilep citte häm 4 keşeneñ ülemenä, 95eneñ yaralanuına säbäpçe buldı.