Sudanda su basularnıñ qorbannarı arta

Sudanda su basular arqasında ülüçelärneñ sanı 205kä citte. İlneñ sälamätlek saqlaw ministrlığınnan yasalğan belderüdä yaralanuçılarnıñ 886 buluı, 26 meñnän artıq öyneñ tulısınça, 33 meñeneñ öleşçä cimerelüe äytelä.

İldä tabiğıy afät näticäsendä taralğan vaba kizüennän ülüçelär dä kübäygän. 185 keşe älege çir arqasında yaqtı dön’yadan kitä. Yoqtıru oçraqları 5 meñ 692gä citä. 12nçe avgustta Sudan xökümäte vabanıñ kizügä äwerelüe xaqında iğ’lan itte.

Sudanda iyül’ belän oktyabr’ ayları arasında su basu häm taşqınnar näticäsendä här yıl 100dän artıq keşeneñ ğomere özelä, öylär, êş urınnarı häm basu-qırlar zarar kürä.

Suğış däwam itüçe ildä sälamätlek saqlaw sisteması citälek däräcädä êşlämi häm yoğışlı çirlärneñ taraluı keşelärneñ tormışın tağın da awırlaştıra.