Zelenskiynıñ utnı tuqtatu öçen planı bar

Ukraina däwlät başlığı Volodimir Zelenskiy utnı tuqtatu öçen plan äzerläwen häm monı xäzerge AQŞ ilbaşı Djo Bayden häm älege wazıyfağa kandidatlar belän urtaqlaşırğa teläwen äytte. Ul İtaliyanıñ Komo küle yarındağı Çernobb’yo şähärçegendä här yıl sentyabr’ ayı başında oyıştırıluçı häm xalıqara waqıyğalar qarala torğan “Ambrosetti forumı”nda qatnaştı. Zelenskiy anda İtaliya jurnalistlarına Ukraina belän Rusiyä suğışı turında söyläde.  

Ukraina liderı territoriyälären birü belän bäyle ul’timatumnarnı qabul itmäyäçäklären häm moña küz yommayaçaqların äytte. Zelenskiy solıx tözü öçen planı barlığın söyläde.

“Ber plan äzerlädem häm monı AQŞ ilbaşı belän urtaqlaşırğa telim, çönki Amerikağa bäyle qayber noqtalar bar. Bu plannı Baydenğa häm kandidatlarğa kürsätü häm fikerlären belü forsatım bulır dip ömetlänäm. Älegä berkem belän dä urtaqlaşmadıq. Berençe bulıp Baydenğa citkeräçäkbez”,-dip söyläde Zelenskiy.     

Ukraina liderı Rusiyäneñ höcümnärdä Tön’yaq Koreyada yasalğan raketalar qullanuın, alarnıñ qaldıqları töşerelgän videoyazmalarnıñ dälil buluın, şul uq waqıtta İranda êşlängän raketa häm dronnar da qullanıluın alğa sörä. Zelenskiy xäzerge waqıtta suğışnıñ axırına yaqınlaşuların, kileşülär belän iq’tisadların nığıtuların häm şul räweşle ciñügä taba baruların söyläde.