İzrail höcümnäre däwam itä

İzrail armiyase Ğazzä sızığına cir östennän, hawadan häm diñgezdän 306nçı köndä oyıştırğan höcümnärdä ülüçe häm yaralanuçılar bar.

Fälästinneñ räsmi agentlığı WAFA beldergänçä İzrail armiyase Ğazzäneñ könçığışında urnaşqan Tuffah mäxälläsendä ber öyne bombağa totqan. Höcümdä berse bala, berse xatın-qız bulğan 3 keşeneñ ğomere özelgän.

İzrail xärbi transportları Ğazzä sızığınıñ Bureyc qaçaqlar şähärçegendäge öylärgä ut açqan. Yaralanuçılar Deyr äl-Belah şähärendäge Aqsa şähitläre xastaxanäsenä cibärelgän.

Nusayrat qaçaqlar lagereneñ tön’yaq-könbatışındağı Ğazzä üzänlege küpere häm tirä-yağı İzrail höcüm köymäläre tarafınnan bombağa totılğan. Xärbi oçqıçlar da lager’neñ Salahaddin prospektındağı öygä höcüm oyıştırğan.

İzrail artilleriyase Zäytün, Täl äl-Hava mäxällälären maqsat itep aldı. Ğazzä sızığınıñ Xan Yunıs häm urta töbägendäge Deyr äl-Bälah şähäre dä İzrail xärbi oçqıçları tarafınnan bombalandı.

Bayt Lahiya rayonında urnaşqan Şeyh Zayid binalarının tirä-yağı häm Räfax şähäreneñ könbatışındağı töbäklär dä tön buyı bombalanğan.