Xäniyyäneñ ülemen tikşerü näticäläre

İranda uzdırılğan tikşerüdä “Xamas” säyäsi byurosı räise İsmail Xäniyyäne üterü “hiç şöbhäsez İzrail tormışqa aşırğan xärbi ğamäl” dip bilgelängän.

“Fars” xäbär agentlığı citkergänçä, üterüne hawadan cirgä atılğan raketa yärdämendä başqarğannar. Ul başqala Tährannıñ tön’yağında Xäniyyä tuqtalğan toraqnıñ 4nçe qatına cibärelgän häm şartlaw näticäsendä säyäsätçe bulğan bülmäneñ täräzäse häm tüşäme cimerelgän.

Amerikanıñ “New York Times” gazetı İsmail Xäniyyäneñ tuqtalğan torağına berniçä ay aldan yäşeren räweştä quyılğan bombanıñ şartlawı näticäsendä ülüen alğa sörgän ide. “Axios” säxifäse isä bombanıñ yasalma zihen qullanuçı innovaśion texnologiyä cihazı buluın häm Xäniyyäneñ bülmädä buluı turında mäğ’lümat alğan İzrail küzläw oyışması “Mossad” agentlarınıñ anı yıraqtan pul’t yärdämendä şartlatuların farazladı.