Hindstanda yuğaltular arta

Hindstannıñ kön’yağındağı Kerala töbägendä köçle yañğırlardan soñ barlıqqa kilgän cir şuışularda ğomere özelüçelär sanı 289ğa citte. Êzläw-qotqaru êşläre 4nçe kön däwam itä.

“India Today”nıñ xäbärenä qarağanda, Kerala töbägeneñ sälamätlek saqlaw ministrı Veena George cir ubılularda yuğaluı belderelgän 220dän artıq keşene êzläwneñ tuqtawsız däwam itüen citkerä. Ul afättän zarar kürüçelärneñ xälen xastaxanä häm lager’larğa barıp beleşä. “Psixologik yärdäm birü häm yoğışlı awırularnı kontrol’ astına alu berençel burıçıbız”,-di ministr.  

Wäqalätlelär Keralanıñ älegä qadär bulğan iñ zur tabiğıy afät kiçerüen, yullar häm küperlärneñ cimerelüen, êzläw-qotqaru êşläreneñ awırlıq belän baruın belderde. Töbäktä 8 meñ 300dän artıq keşe êvakuaśiyälänä. Alarnı 82 yärdäm lagerına urnaştıralar.

Hindstan meteorologiya idaräse afät bulğan qayber cirleklärdä kiläse könnärdä tağın da kübräk yañğır kötelüen belderde.