Peskov "İnstagram"nı açu yaqlı

Kreml’ süzçese Dmitriy Peskov “İnstagram” platformasınıñ Rusiyädä qabat açıluınıñ yaxşı bulaçağın, tik “suğış şartları”nıñ moña kirtä quyuın belderde.

“TASS” agentlığı anıñ süzlären bolay kiterde: “Äye, min mömkin bulğança qısqa waqıtta açıluı kiräklegen uylıym, bu minem fikerem”.

Peskov Rusiyäneñ tawışın häm döreslekne dön’yağa işetterü öçen platformağa kerü çikläwen beterüneñ yaxşı bulaçağın uylıy.  Monnan alda “Roskomnadzor” yaqın kiläçäktä “İnstagram” tıyuınıñ beterelüeneñ kötelmäwen citkergän ide. Platforma, Ukraina suğışı başlanğaç, 2022nçe yılnıñ martında Rusiyädä êkstremist oyışma dip tanıldı häm tıyıldı.