Ğazzäne cimereklärdän çistartu öçen 15 yıl kiräk

BMO citkergänçä, 7nçe oktyabr’dän birle İzrail höcümnäre astındağı Ğazzä sızığında 40 million tonna cimereklär barlıqqa kilgän, bolarnıñ barısın çistartu öçen 15 yıldan artıq waqıt kiräk bula. Bäyäse isä 500 millionnı uzıp kitäçäk.

BMO Yaqın Könçığıştağı fälästinle möhacirlärgä yärdäm häm mäşğul’lek agentlığınıñ sośial’ media akkauntında bu xaqta yazma çıqtı. Andä äytelgänçä, cimereklärdä şartlamağan bombalar häm zararlı matdälär bulırğa mömkin. Älege xäl ülem yanawı barlıqqa kiterä.

İzrail armiyäseneñ 7nçe oktyabr’dän birle däwam itüçe höcümnäre arqasında kübese xatın-qız häm bala täşkil itüçe 38 meñ 664 fälästinle ülde, 89 meñnän artığı yaralandı.