İranda ilbaşın berençe turda saylıy almadılar

İranda uzğan saylawlarda ilbaşına kandidatlarnıñ berse dä 50%lıq bar’yernı uza almadı. İn küp tawışnı cıyğan reformaçı kandidat Mäsud Päzäşkiyan belän konservativ Säyet Cälili ikençe turğa qaldı.   

İl külämendä 59 meñ üzäktä quyılğan ärcälärdä tulayım 24 million 535 meñ 185 keşe tawışın qullanğan. Päzäşkiyan alarnıñ 10 million 514 meñ 191en alğan, bu 42,5% digän süz. Cälili öçen 9 million 473 meñ 298 keşe tawış birgän. Bu 38,6%.  

Şulay itep älege ike namzät 5nçe iyül’dä uzaçaq ikençe turda yarışaçaq.

Saylawda qatnaşu 40% tiräse bula.

Süz uñayınnan, İrannıñ Sistan-Bälücistan töbägeneñ Rask şähärendä tawış birü ärcälären taşuçı texnikağa qorallı höcüm buldı. Anda 2 keşe ülde, qayber xezmätkärlär yaralandı.