İranlı jurnalistlar deportaśiyalängän

Soğud Ğaräbstanı İran däwlät televideniyese xezmätkäre bulğan 6 jurnalistnı deportaśiyaläde.

İran däwlät televideniyese Soğud Ğaräbstanındağı Xac wäkilçelegendä êşläwçe jurnalistlarnıñ uzğan tönne ildän cibärelüen citkerde.

4 jurnalist uzğan atnada Mädinädäge Mäsciden-Näbäwine töşergän waqıtta qulğa alınğan, berniçä sägät’lek soraw aludan soñ qulğa alu üzägenä cibärelgän.

Soğud Ğaräbstanı poliśiyase ike könnän soñ İranlı xacilär qalğan qunaqxanädäge ber dini cıyında qatnaşırğa telägän 2 xäbärçene qulğa alğan.

İrannıñ Soğud Ğaräbstanındağı Xac wäkilçelegenä bäyle wazifa başqarğan älege jurnalistlar uzğan tönne Soğud Ğaräbstanı xökümäte qararı belän deportaśiyalände.

Başta Berlӓşkӓn Ğaräp Ämirlekläreneñ Dubay şähärenä cibärelgän, bügen irtänge sägät’lärdä İran başqalası Tähranğa barıp citkän xäbärçelärne qarşı alğan İran teleradiokompaniyase başlığı Peyman Cebelli jurnalistlarnıñ qulğa alınuınıñ häm ildän cibärelüeneñ säbäpläre xaqında üzenä mäğlümat birelmäwen äytte.