Bolgariyä Rusiyä maşinalarına ilgä kerüne tıydı

Rusiyä nomerlı texnikağa Bolgariyägä kerü tıyıldı. Bu xaqtağı xäbär Tamğaxanälär agentlığınıñ räsmi internet säxifäsendä çıqtı. Anda äytelgänçä, 10 keşegä qadär yulçı yörtüçe Rusiyä nomerlı transportnıñ ilgä kerüe dä, tranzit ütüe dä tıyıldı.

Rusiyäneñ Ukrainağa qarşı alıp baruçı suğışı säbäple monı Bolgariyägä Awrupa komissiyäse täq’dim itä. Älege tıyudan Rusiyäneñ diplomatik wäkilleklärenä qarawçı maşinalar azat.

Xäzerge waqıtta Bolgariyädä bulğan Rusiyä nomerlı maşinalarğa ildän kitüläre öçen 6 ay waqıt birelä.

Çik buyı poliśiyäse mödire, baş komissar Anton Zlatanov, maşinalardan tış, Rusiyä watandaşlarınıñ qayber şäxsi mölkätlärenä dä tıyu kerteläçägen belderde. Anıñ isemlege soñınnan açıqlanaçaq.

Şulay itep, Awrupada Rusiyä nomerlı transportqa tıyu kertelgän däwlätlär sanı 8 buldı. Monnan alda Êstoniya, Latviya, Litva, Finlyandiya, Pol’şa, Germaniya häm Norvegiyä oxşaş qarar çığardı.