Kim Çen In Rusiyägä bara

Tön’yaq Koreya liderı Kim Çen Innıñ Rusiyä däwlät başlığı Vladimir Putinnıñ çaqıruına cawap itep Rusiyägä kitäçäge belderelde. Bu xaqta Koreya üzäge xäbär agentlığı KCNA citkerä. Älege säfärneñ urını häm waqıtı turında detal’lär urtaqlaşılmıy. Barı yaqın könnärdä bulaçağı ğına äytelä.

Ä menä Kön’yaq Koreya xäbär agentlığı Yonhapnıñ xäbärenä qarağanda, Kim Çen In inde yulğa çıqtı. Maxsus bronepoyızd belän yasaluçı yulçılıqnıñ yaqınça 20 säğat’ däwam itüe kötelä. Tön’yaq Koreya liderınıñ Vladivostokta Könçığış iq’tisad forumında qatnaşaçağı uylanıla.

Kimnan alda Tön’yaq Koreyanı citäklägän ätise Kim Çen İr dä oçarğa qurquı arqasında 17 yıllıq wazıyfası çorında gel poyızd belän säyäxät itä. Ul Qıtayğa häm Rusiyägä barı şul transport belän bara häm 2011nçe yılda poyızdda yöräk öyänäge kiçerep ülä.

“The New York Times” gazetınıñ Amerika wäqalätlelärenä tayanuçı xäbärendä Tön’yaq Koreya liderı Kimnıñ bu ayda Rusiyägä säfär yasayaçağı häm Putin belän Ukrainadağı suğışta Mäskäwne tağın da kübräk qoral belän täêmin itü häm törle mäydannarda xärbi xezmättäşlek mömkinleklären söyläşü öçen oçraşaçağı alğa sörelde.