İşarä tele - räsmi tel

Kön’yaq Afrika cömhüriyäte işetmäwçelär qullana torğan işarä telen 12nçe räsmi tel dip iğ’lan itte. İlbaşı Siril Ramafosa administrativ başqala Pretoriyädä uzğan çarada bu xaqtağı qanunnı imzaladı.

Ul tantanadağı çğışında işarä telen räsmi tel itep qabul itüneñ Kön’yaq Afrika demokratiyäse öçen möhim êtap buluın belderde. “İşarä tele belän añlaşuçı keşelärneñ xoquqların kiñäytep, cämğıyät’täge abruyın kütärergä niyätlibez,”-dide Ramafosa.

Kön’yaq Afrika, şulay itep, Keniya, Zimbabve häm Ugandadan soñ işarä telen räsmi tel bularaq qabul itkän 4nçe Afrika ile buldı.

Kön’yaq Afrika cömhüriyätendä moña qadär 11 räsmi teldä söyläşälär ide, işarä tele – 12nçese.