Cirdän çığarılğan su küläme Cirneñ äylänü küçären küçergän
Yaña ber tikşerenügä kürä, keşelärneñ cir astınnan bik küp itep su aluı cir şarınıñ äylänü küçären barı tik 20 yılda yaqınça 80 santimetr könçığışqa küçergän
BBC xäbär itüençä, Cirneñ qotıbındağı (polyusındağı) taypılunı öyränüçe tikşerenüçelär cir astı sularınıñ yoğıntısı bulmıy torıp mondıy üzgäreşneñ mömkin bulmayaçağın añlata.
Cir şarınıñ üz tiräsendä äylänä torğan küçäre totrıqlı häm xäräkätsez strukturada tügel.
Cir şarı tön’yaq häm kön’yaq qotıplarınnan uzğan xıyalıy sızıq östendä äylängän çaqta taypılıp selkenä häm bu xäräkät qotıp (polyar) gizüe dip atala.
Tön’yaq qotıp (polyus) noqtasınıñ här yıl 10 metr kiñlegendä tügäräk sızuı belenä.
NASA amerikan ğaläm tikşerenüläre departamentı 20nçe ğasırda cir şarınıñ äylänü küçäreneñ ber yılda 4 santimetrğa taypıluın tapqan ide.
Soñğı waqıtlarda ütkärelgän tikşerenülärgä kürä isä, klimat krizisınıñ cir şarınıñ äylänüendä taypıluğa säbäp buluı tabılğan, fäqät cir astı sularınıñ bu taypıluğa yoğıntısı tulısınça bilgelänmägän ide.
