3 million 400 meñ keşe yärdäm kötä

Üzäk Afrika cömhüriyätendä 3 million 400 meñ keşe gumanitar yärdämgä häm yaqlawğa moxtac.

Berläşkän Millätlär Oyışmasınıñ Üzäk Afrika cömhüriyäte gumanitar yärdäm koordinatorı Moxämmät Ag Ayoya ildäge wäzğıyät’ turında BMOnıñ Jeneva ofisında çığış yasadı. Ul kritik xälneñ däwam itüen belderde.

“Bıyıl 3 million 400 meñ keşe yäisä xalıqnıñ 56%ı gumanitar yärdämgä häm yaqlawğa moxtac. Bolarnıñ 2 million 400 meñe bik awır xäldä häm tormışları qurqınıç astında,”-dide Moxämmät Ag Ayoya.

Ul ildäge qabatlanuçı bäreleşlärneñ xalıq xäräkätlärenä kiterüen häm üzgärüçän iminlek xäle belän näticälänüen äytä. Üzäk Afrika cömhüriyätendäge här 5 watandaşnıñ berse yä il êçendä yäşägän urınınnan küçenä, yäisä kürşe däwlätkä sıyına.

Koordinator uzğan yıl bulğan su basularnıñ, aldağı yıllarğa qarağanda, öç tapqır kübräk keşegä (yaqınça 100 meñ) täêsir itüen häm 6 meñnän artıq yortnıñ cimerelüenä kiterüen söyläde. Ul ildä sośial’-iq’tisadi asqorma, xezmät häm yäşäw çığanaqlarına qarata investiśiyä citmäwenä basım yasadı. Ayoya Sudandağı bäreleşneñ yoğıntısı belän gumanitar ixtiyaclarnıñ tağın da naçarğa taba kitüen citkerde. İlgä sıyınğan 14 meñ sudanlı bolay da çikle çığanaqlarğa östämä basım tudıra.

Ayoya bıyıl Üzäk Afrika cömhüriyätendä 2 million 400 meñ yaqlawçısız keşegä yärdäm itärgä maqsat itep quyuların belderde.