Ğıyraq Türkiyä belän xezmättäşlekne arttırığa teli

Ğıyraq tışqı êşlär ministrlığı süzçese Ahmäd äs-Sahhaf Türkiyädäge saylawlardan soñ barlıqqa kilgän yaña çorda Ğıyraq-Türkiyä mönäsäbätläreneñ barışı häm kötelgännär turında “Anadolu” agentlığına açıqlawlar yasadı.

İlbaşı Räcäp Tayyip Ärdoğannıñ yañadan Däwlät başlığı bulıp saylanuınnan şat buluların citkerüçe Sahhaf: "Bağdat belän Änkara arasındağı mönäsäbätlär böten ölkälärdä üseş ala. İlbaşı Ärdoğannıñ yañadan ciñüe törek xalqınıñ ixtıyarın kürsätä,” – dip äytte.

Ğıyraq tışqı säyäsäteneñ "xalıqlarnıñ ixtıyarına xörmät” nigezenä tayanuın belderüçe Sahhaf: "Kürşe häm qardäş törek xalqınıñ bu yünäleştäge qararın ixtiram belän qarşılıybız,” - dide.

Yaña däwerdä ike il mönäsäbätlärenä qağılışlı kötelgännär xaqında isä Sahhaf bolay dip bilgeläp uzdı:

"Mönäsäbätlärebezneñ aldıbızdağı çorda da iq’tisad, üseş, su häm terrorçılıq belän köräş kebek böten ölkälärdä urtaq dialog nigezendä alğa alıp barıluın yaqlıybız häm xezmättäşlegebezneñ artuın telibez. İke il arasındağı säwdä küläme dä arta. İke il arasında yaqınlaştıruğa kiteräçäk härtörle dialog ähämiyätle. Ğıyraq bularaq tigez, totrıqlı mönäsäbätlär häm ike il xalqınıñ mänfäğäte öçen böten forsatlarnı bäyälibez."