Sudanda bäreleşlär tuqtamıy

Sudan armiyäse belän suğışçan “Operativ yärdäm köçläre” törkeme arasında kiçä utnı tuqtatunıñ soñğı könendä başqala yanında bäreleşlär dawam itte. Xartumnıñ könbatışındağı Umdurman häm tön’yağındağı Baxridä awır qorallar belän atışu buldı.  Anda qayber yortlar cimerelde, cirlektä yäşäwçelär başqa urınnarğa qaçtı.

Armiyä qayçandır “Operativ yärdäm köçläre” törkemen yaqlıy ide. Tik bäysez häm parallel’ armiyä şikelle êş itüe arqasında anı yanaw bularaq kürä başladı. 2 yıl êçendä törkemneñ tulısınça armiyägä kerüen taläp ittelär. “Operativ yärdäm köçläre” isä grajdanlı xökümät kilgännän soñ 10 yılğa suzılğan quşılu prośessın qabul itäçägen belderde. Älege äytkäläşü häm kiyerenkelek 15nçe aprel’dä yaqlar arasında başqala Xartumda häm başqa şähärlärdä qorallı bäreleşlkä äwerelde. 

“Operativ yärdäm köçläre” 2019nçı yılda tüntärelgän ilbaşı Ömär äl-Bäşir çorında Darfurda ğıys’yançılarğa qarşı suğışu, çiklärne häm tärtipne saqlaw maqsatınnan oyıştırıla. Törkem torğan sayın bäysez strukturağa äwerelä. Anıñ distälärçä meñ äğ’zası bar.

Berläşkän Millätlär Oyışması bäreleşlär säbäple il êçendä 1 millionnan artıq keşeneñ yäşägän urınnarın taşlap kitüen belderde. 300 meñ keşe isä kürşe däwlätlärgä qaçtı.

Bötendön’ya sälamätlek saqlaw oyışması Sudanda baruçı bäreleşlär säbäple 850 keşeneñ ülüen, 5 meñ 500 keşeneñ yaralanuın belderde.

Amerika Quşma Ştatları häm Soğud Ğaräbstanı Sudan armiyäse belän “Operativ yärdäm köçläre” arasındağı bäreleşlärgä noqta quyu öçen Ciddä şähärendä söyläşülär alıp bara ide. Tik ike yaqnıñ da utnı tuqtatu kileşüen bozuı arqasında ul tarqatıldı.