BMO: “Ukrainada sälamätlek saqlaw qorılmaları höcümgä duçar bula”
Berläşkän Millätlär Oyışması Ukrainada suğış başlanğan 2022nçe yılnıñ fevral’ ayınnan birle 1000nän kübräk sälamätlek saqlaw qorılmasına höcüm oyıştırıluın belderde
BMO süzçese Stefan Dyujarrik köndälek matbuğat oçraşuında mäs’älä belän bäyle bularaq yasağan belderüendä cirlektäge BMO xezmätkärläreneñ sälamätlek saqlaw qorılmalarınıñ här kön diyärlek nişan itep alınuın belderüen citkerde.
Barı tik kiçä genä Doneśk töbägendä 3 sälamätlek saqlaw qorılmasınıñ bombalanuın belderüçe Dyujarrik: "Sälamätlek saqlaw qorılmalarına qarşı höcümnär front sızığınıñ här ike tarafında da yasaldı. Qayda ğına bulmasın sälamätlek saqlaw qorılmaların nişan itep alu yäki bombalaw humanitar xoquqnı bozu dimäk,” – dip kisätte.
Dyujarrik şul uq waqıtta Bötendönya sälamätlek saqlaw oyışmasınıñ 15 ay êlek başlanğan Rusiyä-Ukraina suğışında sälamätlek saqlaw qorılmalarına ber meñnän kübräk höcüm buluın, şuşı höcümnärneñ 240 keşeneñ ülemenä häm sälamätlek saqlawçılar belän xastalarnıñ yaralanuına säbäp buluın äytte.
Ukrainanıñ könçığışı belän kön’yağındağı sälamätlek saqlaw qorılmalarınıñ yartısınıñ diyärlek funkśional’ bulmawın belderüçe Dyujarrik xäzergä çaqlı BMO häm humanitar yärdäm urtaqlarınıñ sälamätlek saqlaw ölkäsendä 3 million keşegä ireşüen, maqsatnıñ yıl axırına qadär 8 million keşegä ireşü buluın iskärtep uzdı.
