Sudandağı waqıyğalar

Sudanda armiyä belän suğışçan Operativ yärdäm köçläre törkeme arasında aprel’ urtasınnan birle däwam itüçe bäreleşlär, 22nçe mayda imzalanğan ber atnalıq utnı tuqtatu kileşüe häm AQŞnıñ sankśiyä yanawlarına qaramastan, kiçä qabat yalqınlandı.

Şahitlärneñ belderüenä qarağanda, başqala Xartumnıñ könbatışındağı Mugren mäxälläsendä ike yaqtan da awır qorallar qullanılğan köçle bäreleş kilep çığa. Xärbi oçqıçlar başqala küklärendä äylängändä cirlektä şartlaw tawışları işetelä.

Yaqlar AQŞ häm Soğud Ğaräbstanı aradaşçılığında 20nçe mayda utnı tuqtatu turında kileşü imzaladı, ul 22nçe maydan cirle waqıt belän säğat’ kiçke 9 tulıp 45 minutta ğamälgä kerde.

AQŞ däwlät särqatibe Êntoni Blinken şunnan soñ belderü yasap, sudanlı generallar bu kileşüne bozsa, sankśiyälär belän oçraşaçaqları turında kisätte.

Sudan saqlanu ministrlığı kiçä layıqlı yaldağı xärbilär häm qulı qoral tota aluçılarnı mobilizaśiyägä çaqırdı.

Xalıq başqala Xartum häm anıñ tiräsendä bäreleşlär kübäygän cirleklärdän il êçendäge imin mäydannarğa häm yänäşädäge däwlätlärgä qaça. Süriyä, Yämän häm Misır şikelle bik küp watandaşı bulğan illär êvakuaśiyälären däwam itä.