Urta diñgezdä ike korab batarğa mömkin

Yaqınça meñ keşene yörtüçe ike köymägä Urta diñgezdä qurqınıç yanawı belderelde. İctimağıy oyışma “Alarm Phone”nıñ citäkçese Moris Stril sudnolarğa su kerüen citkerä. Älege oyışma awır xäldä qalğan migrant köymälärennän kilüçe çaqırularğa cawap birü, wäqalätlelärgä xäbär itü häm qotqaru beläñ şöğıl’länä.

Moris Stril här köymädä yaqınça 500 keşe buluın äytä. Anıñ törkeme berençe bularaq kiçä İtaliya häm Mal’ta dairälären awır xäldä qaluları turında kisätkän.

“Alarm Phone” oyışmasınıñ Twitter säxifäsendäge belderüdä bolay diyelä: “Bu keşelär berniçä kön êlek Liviyädän qaçuların häm motorlarınıñ tuqtawın belderde. Wäqalätlelärgä xäbär birelde. Qotqaru êşçänleklärenä aşığıç häm kiçekmästän kereşü kiräk”.

“CNN International” Mal’ta häm İtaliya diñgez kontrol’ üzäklärennän bu mäs’älä belän bäyle cawap alınmawın yazdı.

Bik küp keşe xoquqların yaqlawçı oyışmalar köymälärne küz uñında totu öçen aktivlaştı.

İtaliyägä diñgez yulı belän kilüçe qaçaqlar sanı citdi räweştä arttı. İlneñ êçke êşlär ministrlığı citkergänçä, bıyıl 46 meñ 656 keşe köymälär belän İtaliya yarlarına ayaq basqan. Uzğan yılnıñ şul uq çorında älege san 17 meñ 972 bula.