Mäktäpkä höcüm waqıtında yaralanğan bala ülde

Serbiyädä 3nçe mayda ber mäktäptä bulğan qorallı höcümdä awır yaralanğan tağın 1 bala xastaxanädä can birde.

İlneñ sälamätlek saqlaw ministrlığınnan belderülärençä, başqala Belgradta Vladislav Ribnikar başlanğıç mäktäbendä 14 yäş’lek K.K. yasağan qorallı höcümendä yaralanğan qız bala ülde. Yädrä anıñ başına tigän bula. Bala xastaxanädä, tabiblarnıñ tırışlığına qaramastan, can birä.

Şulay itep, älege qurqınıç höcümdä ülgän balalarnıñ sanı 10ğa citte.

Serbiyä ilbaşı Aleksandr Vuçiç ildä soñğı çorda bulğan ike qorallı höcümnän soñ iminlek köçlärenä tapşırılğan qorallar saqlanuçı Smederevo şähäre tiräsendäge Duvanistä kiçä yasağan belderüendä 8nçe maydan bügengä qadär 13 meñ 500 röxsätsez mıltıq, distälärçä meñ yädrä häm yaqınça 2 meñ şartlatqıç matdäneñ tapşırıluın citkerde.

Vladislav Ribnikar başlanğıç mäktäbendä 3nçe mayda K.K. isemle yäşüsmer iminlek saqçısı häm uquçılarğa ut açtı. Höcümdä 8 bala, ber iminlek xezmätkäre – barlığı 9 keşe hälaq buldı. 7 keşe yaralandı. Alarnıñ 6se bala, berse uqıtuçı ide.